Evi satmamışdan və kirayə verməmişdən qabaq tavanın səliqəyə salınması
Məzilini satmaq və ya kirayə vermək istəyənlər, müştəri axtarışı üçün evlərinə kosmetik əl gəzdirirlər. Bəzən bahalı təmirə ehtiyac qalmır. Bu sıradan kosmetik işlərə tavanın səliqəyə salınması, ləkələrdən təmizlənməsi mərhələsi də aiddir. Tavanlar mətbəxdəki bişmiş yeməklərin, siqaret tüstüsünün təsirindən saralır və ya yuxarı qonşunun səriştəsizliyi, kanalizasiya borularının deşilməsi, evdə nəmişliyin artıq olması nəticəsində su axını yol verilərək, tavanınızın boyası şişir. Nəticədə bütün bu problemləri aradan qaldırmaq lazım gəlir. Hər bir halda tavanın boyasının bərpası çətin olsa da, onun da əlbət bir çarəsi var.
Bunun üçün sizin müəyyən bacarığınız və əlinizin altında lazimi alətlər olmalıdır. Bunlara daxildir: rəngsaz malası, ağ rəngdə parlaq yağlı boya, plastik və ya metal lövhə (qab), fırça, süngər, xlorlaşdırılmış məhlul və bir də rezin əlcəklər.
İlk öncə ləkənin yaranma səbəbini araşdırıb tapmaq lazımdır. Ləkə seçildikdən sonra ardınca fəaliyyətə başlaya bilərsiniz. Su və ya pas ləkəsi bu cür çıxarılır: əvvəlcə problemli hissədən rəngsaz malası ilə boya və suvaq təmizlənir. Sonra xlorlaşdırılmış məhlul ilə həmi yeri silmək lazımdır. Daha sonra süngəri götürüb, xlorlaşdırılmış məhlula salıb çıxarıb sıxırıq və zədələnmiş hissəyə 5-6 saniyə ərzində möhkəm tuturuq. Əgər süngər ləkədən böyükdürsə, o zaman onunla ləkəni bir neçə dəfə hissə-hissə təmizləyirik. Bütün bu prosesləri o zamana kimi təkrarlayırıq ki, ləkə ağarmağa başlasın.
Bundan sonra gözləmək lazımdır ki, ləkə olan hissə qurusun. Əgər saralma yenidən müşahidə olunsa, prosesi davam etdirmək lazım olacaq. Ardınca fırça ilə akril əsaslı rəng astarı ilə emal olunmalıdır. Astarın quruması çün bir gün gözləmək gərəkdir. Sonra qurumuş astarın üzərinə akril zamaska vurub yenidən bir gün gözləmək lazımdır. Qurumuş zamaskanın artıq hissələri kiçik sumbata kağızı ilə sürtülüb təmizlənir. Sonda isə zədələnmiş hissə fırça ilə boyanır və ardınca eyni proses bütün tavana tətbiq olunur. Nəzərənizə alın ki, problemin kükünü həll etməsəniz, pas və su izi yenidən peyda ola bilər. Ona görə də problem köklü şəkildə aradan qaldırılmalıdır.
Yağla mübarizə isə daha çətin olur. Yağ zamaskaya daha dərin hopduğuna görə ləkənin çıxarılması zamanı əngəllər törədir. Ləkə hissəsindəki boya ilə suvağı qazıyıb, oranı emal edib rəngləsəniz belə, bir müddət sonra ləkə izi yenidən peyda ola bilər. Bu isə xoşagələn bir hadisə deyil. Yağ ləkəsi ilə mübarizə hardasa su və pas ləkələri ilə mübarizə üsuluna bənzəyir. Belə ki, ilk öncə zədələnmiş yeri rəngsaz malası ilə qazımalı, həmin hissəni astar ilə emal etməli və sonra səthin qurumasını gözləməlisiniz.
Ardınca diyircəkli fırça ilə mövcud hissəyə ağ boya sürtülür. Boya quruduqdan sonra bu proses bir neçə dəfə təkrar olunur. Az müddətə ləkə görsənməsə də bir neçə gün gözləməyiniz lazımdır. Çünki bu vaxt ərzində o yenidən peyda ola bilər. Yox əgər ləkə meydana çıxmasa, o zaman tavanı bütövlükdə rəngləyə bilərsiniz. Ləkənin üzə çıxmasında isə, daha doğrusu həmin hissənin əsas hissədən rəng və parlaqlığına görə fərqlənsə, həmin hissəni bir neçə dəfə parlaq akril ilə rəngləyin. Və sonda tavanı ümumilikdə boyayın.
Tüstü ləkələrini silmək üçün xüsusi məhlul hazırlamaq lazımdır. Bir xörək qaşığı ortofosfat natriyə 3.5 lit su əlavə edib yaxşıca qarışdırılmalıdır. Sonra süngəri həmin məhlulun içinə salıb yaşladıb, çıxarıb qurudub, ləkə düşmüş səth astaca silinməlidir. Məhlul səthə hoparaq öz işini görəcək. Daha sonra səthin ağardığını gördükdə, prosesi saxlamaq lazımdır. Ən sonda bütün tavanı bir qat ilə gedilməlidir.