Yayda villa kirayəsi
Yay fəslinin yolunu gözləyənlərin sayının çox olduğunu desək, yanılmarıq. İl boyu gərgin işlə məşğul olan vətəndaşlar, ezamiyyət götürərək, nəhayət istirahət edə biləcəkləri fürsəti əldə edirlər. Bəziləri dənizə üz tutur, bəziləri il boyu hansısa xarici ölkə barədə arzu edirlər, bəziləri isə bölgələrdə istirahəti üstün tuturlar. Xarici ölkələrə üz tutanların sayı az olmasa da, hər kəsin ailə büdcəsi buna yol vermir. Dənizdə istirahətə gəldikdə isə, adətən ora həftə sonları üz tuturlar. Təmiz hava, təbiəti sevənlər, paytaxt tıxaclarından və problemlərindən uzaq qalmaq istəyən vətəndaşlar bölgələrə gedilər. Bəzən turlara qoşulurlar, bəzənsə istənilən bölgədə villa kirayə götürərək, ailəliklə gedirlər.
Bəziləri villa axtarışına artıq fevral ayından başlayır. Lakin bu dövrdə evi kirayə verən villa sahibləri elanları yerləşdirməyə tələsmirlər. Buna görə də ən yaxşı vaxt aprel-may ayları sayılır.
Villa seçərkən orta və bahalı olmayan evlərə üstünlük verə bilərsiniz. Sayt üzrə, kənar yerdən axtarış etməzdən qabaq, məsləhətdir ki, yaxın qohumlardan, qonşulardan və ya tanışlardan bu barədə soruşasınız. Və ya sosial şəbəkədə status yazaraq, kömək istəyə bilərsiniz. Ola bilsin ki, eyni vaxtda kimsə görər və sizə özünün və ya tanışının məsləhət bidiyi bir ev barəsində məlumat verər. Tanış olduqda, ev pulunu da, qalma müddətini də sadəcə sözdə razılaşa bilərsiniz.
Yox əgər tanışlardan bir xəbər çıxmırsa, ev alqı-satqısı elanları yerləşdirən saytlardan axtarış edə bilərsiniz. Bahalı bir villa arzusundasınızsa, o zaman bu işlə məşğul olan agentliyə müraciət edə bilərsiniz. Onlar sizə bir neçə yaxşı variantlar da sadalayacaqlar və ümumiyyətlə ətraflı məlumat verəcəklər.
Villaların qiyməti bölgələrə görə dəyişir. Lakin ümumi götürsək, bu qiymət günlük 40-50 AZN civarında dəyişir. Bura iki otaqlı yataq otağı, sanitar qovşağı, isti və soyuq suyu olan duş, mətbəx, maşın saxlamaq üçün qaraj və ya həyət, bir də köşk daxildir.
Günlük qiyməti 100-120 AZN arasında dəyişən villalar isə həm geniş olurlar, həm də hovuzları olur.
Villa sahibi ilə razılaşmamışdan qabaq, dəqiqləşdirin ki, ev tamamilə sizə verilir, ya onun hər hansı bir hissəsimi? Azərbaycanda bu cür villaları aylıq çox az adam kirayəyə götürür. Birincisi, bu iş yerlərindən verilən ezamiyyət günlərinin azlığından irəli gəlir. Bu hardasa bir həftə ilə iki həftə arası dəyişir. Buna görə də villanı bir aylığa kirayəyə götürmək kirayişinə heç cür sərf etmir. Bunu nəzərə alaraq, villa sahibləri bölgələrdə daha çox evləri gündəlik formada verirlər. Adambaşına minimum 10 AZN, maksimum isə 20 AZN-dir.
Villa seçərkən, çalışın gəzməli və görməli yerlərə yaxın olsun. Üstəlik villa sahibindən yaxınlıqda apteklərin, mağazaların, bazarların, xəstəxananın, polis bölməsinin olub-olmaması ilə maraqlanın.
Evi seçərkən orada məişət avadanlıqlarının – ütünün, soyuducunun, tozsoranın, qab-qacaqların, qəhvədanın və s. olması vacibdir. Əks halda sizə lazım olduğu zaman əlinizin altında heç nə tapa bilməyəcəksiniz. Bu cür villalarda adətən, ev sahibi yaxınlıqda öz evində yaşayır. Buna görə də istənilən vaxt zəng edib ondan yardım istəyə bilərsiniz. Villanı təhvil almamışdan qabaq çalışın villa sahibini sual atəşinə tutasınız. Özünüzdə də qeydlər aparın. Gəzməyə çıxacağınız təqdirdə, villa sahibi ilə məsləhətləşin. Bəzən görməli yerləri gəzmək yad adamlar üçün daha baha başa gəlir. Qısa və asan yolları öyrənin.
Qiyməti ev sahibi ilə dəqiqləşdirin. Açığı yuxarıda qeyd etdiyim kimi az müddətli götürürsünüz deyə, hər hansı bir müqavilə bağlanacığına inanmıram. Müqavilədən də qabaq insanlıq gəldiyi üçün, bəzən adi verilən söz belə buna kifayət edir.