Taxta evləri necə qorumalı
Həyət və əsasən də kənd evləri sevənlər üçün taxta evlər çox gözəl seçimdir. Çoxsu daş evlərə üstünlük versələr də, təbəitə yaxın olmaq istəyənlər, öz sağlamlıqları barədə dərin düşünənlər üçün taxta material birinci yerdədir. Düzdür, taxta evləri tikənlər adətən onları sonra ev-alqı satqısında satmırlar. Yay mövsümündə bağ evi, villa kimi kirayə verə bilərlər, amma bu evlər uzun illərin arzusu olduğu üçün heç kim onları satmağa əli gəlməz. Bəziləri isə taxta evlərin yanğına qarşı qorumasız olduqları üçün ondan çəkinirlər və daş evlərə üstünlük verirlər. Gəlin baxaq görək, taxta ev tikildikdən sonra onu necə və nə ilə emal edirlər.
Taxta materialı həm evlərin, hamamların tikilməsində əsas, həm də üzləmə materialı kimi istifadə oluna bilər. Bu artıq evi tikənin seçimindən asılıdır. Ekoloji təmiz material kimi taxta daha çox ətraf aləmin təsirinə məruz qalır. Məsələn, nəmişlik, böcəklər, göbələklər, yanğın, günəş şüaları və s. taxtanın ömrünü azaldan faktorlardır. Taxta materialını bu cür təsirlərdən müdafiə etmək, onun daha da uzunömürlü olması üçün xüsusi vasitələrlə emal etmək lazımdır. Müasir tikinti bazarı müxtəlif çeşiddə antiseptiklər və hopdurucu maddələr təklif edir. Uyğun olan maddəni seçmək üçün bilmək lazımdır ki, gələcəkdə o hansı emal üsulu üçün istifadə olunacaqdır.
Mütləq şəkildə istifadə qaydalarına və istifadə ardıcıllığına əməl etmək lazımdır. Taxta materialı xarici təsirlərdən müdafiə etmək üçün ən yaxşı üsul komplekt şəkildə emal üsuludur. Taxta torpaq ilə təmasda olmasın deyə, kərpic və ya daş kürsülükdən istifadə olunur. Bundan başqa taxtanı nəmişlikdən qorumaqdan ötrü evin alt hissəsinə xüsusi havalandırma mexanizmi quraşdırırlar.
Taxta daha çox özünə nəmi hopduran material olduğundan, onu su və onun bütün aqreqat hallarından qorumaq lazımdır. Nəmişliyin artması nəticəsində taxta şişib böyüyür və sonra quruyub çatlayır. Artıq dərəcədə nəmişliyin yığılması kif göbələyinin artmasına səbəb olur. Göbələk isə taxtanı tez bir zamanda məhv edir. Məsələn, ağ ev göbələyi taxtaya düşəndən bir ay sonra 30-40 mm qalınlıqda döşəməni tamamilə xarab edə bilər. Göbələklərin ilk əmələ gəlmə əlamətləri taxta səth üzərindəki qara ləkələrdir. Təəccüblü deyil ki, bazarda ən çox qoruyucu maddələr su itələyici xassəyə malikdirlər. Onlar özləri ayrılıqda qoruyucu maddə kimi, başqa maddələrin tərkibində də çıxış edə bilirlər. Suya davamlı hopdurucuların tərkibində əlavə xüsusi qoruyucu maddələr var. Hopdurucular əsasən boyadan qabaq vurulur və oda davamlılığa malik olurlar. Oda davamlı hopdurucuların tərkibində antipirin olur.
Taxtaya yüksək tempratura qarşı davamlılıq verir, ancaq bu, o demək deyil ki, taxtanın yanmamasına yüz faizlik zəmanət verir. Sadəcə yanğın təhlükəsini minimuma endirir. Əlavə üstünlük o olur ki, bu cür mühitdə həşəratlar daxil olub çoxala bilmirlər. Kif göbələyinə və çürüməyə qarşı hopdurucuları üç-beş ildən bir taxtaya vurmaq lazımdır. Xarici emal üçün istifadə edildiyinə görə su itələyici xüsusiyyətə malik olur. Rəngi şəffaf olduğundan, hopdurulduğu taxtanın təbii rəngini saxlayır və əlavə parıltı verir. Əgər taxtaya xüsusi rəng vermək istəsəniz hopdurucuya rəng qata bilərsiniz.
Hopdurucular bir neçə yerə ayrılırlar: su əsasında olanlar, duz əsasında olanlar və bir də yağ əsasında olanlar. Su əsasında olan hopdurucular universal sayılırlar. Onlar həm daxildə, həm də xaricdə tətbiq edilə bilirlər. Həm antiseptik, həm su itələyici, həm də yanğına dözümlü xüsusiyyətə malik olurlar. Duz əsasında olanlar taxta materialı duz kimi örtür.
Lakin müəyyən müddətdən sonra materiala hopur deyə, onu xüsusi vakum kameralarında hopdururlar. Adətən, taxta ilə metal birləşən yerə tətbiq olunmurlar, çünki həmin yerdə paslanma baş verə bilər. Yağ əsasında olan hopdurucular da su itələiyci, yanğına davamlı xüsusiyyətə malik olurlar və taxtaya hoparaq onu yaxşı qoruyurlar. Ancaq zəhərli olduqları üçün bağlı məkanlarda tətbiq etmək olmur.
