Ev alqı-satqı zamanı hansı mənzil çətin satılır
Bəzən mənzili satmaq istəyən mənzil sahibi öz evini daşınmaz əmlak bazarına çıxarır və ümid edir ki, çox yaxın bir zamanda həmin mənzili satıb gəlir əldə edəcək. Ancaq üstündən xeyli keçməyinə baxmayaraq nə telefon nömrəsinə zəng gəlmir, nə də ki, kimsə elektron poçt ünvanına yazmır. Mənzilin satılmama səbəbləri çox ola bilər. Burada bir faktorun rol oynaması hər zaman özünü doğrultmur. Mənzilin yerləşdiyi yer, uyğun olmayan qiymət, uğursuz layihələndirmə və s. kimi amillər onun satılmasına mane ola bilər. Bəs görəsən mənzilini sata bilməyən mənzil sahib nə etməldir?
İqtisadi böhranlar hər zaman daşınmaz əmlak bazarında öz sözünü deyir. Yeri gəlmişkən, ABŞ 2008-ci ildə baş verən iqtisadi böhran məhz daşınmaz əmlakla bağlı idi. Böhran nəticəsində hər şey öz axarını zəiflədir, bəziləri isə ümumiyyətlə dayandırır. İşsizlik fonunda mənzilə real alıcı tapmaq çətinləşir. Misal üçün, daşınmaz əmlak bazarında mənzillərin yalnız üçdə biri təqdim olunan qiymətə satılırlar. Digərlərinin sahibləri isə mənzillərin qiymətində beş faizdən iyirmi faizə qədər endirim etməyə məcbur olurlar.
Əgər o vaxt yaxşı mənzil bir-iki ay müddətində satılırdısa, indi həmin period dörd-beş ayı əhatə edir. Bu rəqəm bir ilə qədər uzana da bilər.
Bazarda mənzilin satılmama səbəblərindən ən vacibi onun düzgün qoyulmayan qiymətidir. Qiymətin real həddən qat-qat yüksək qoyulması hər zaman mənzil sahibinin hərisliyindən irəli gəlmir, sadəcə onlar bu qiymətlərə subyektiv yanaşırlar. Misal üçün, mənzil sahibi mənzilini vaxtıkən çox baha qiymətə təmir etdirib. Alıcıya bütün bu təmirlə bağlı incəliklər lazımsız görsənir, onlara real obyekt lazımdır. Ancaq ev sahibi mənzilə çəkdiyi əziyyəti heç cürə unuda bilmir.
Realda ucuz olan, amma bahalı təmirə görə qat-qat yüksək həddə çatan mənzillərin bazarda qalma periodu beş ilə qədər uzana bilər. Buna görə də mənzilinizi gələcəkdə satmaq fikrinə düşsəniz, çalışın onu əlavə yükləməyəsiniz. Bu cür mənzilə real alıcı tapsanız da bu axtarış tez bir zaman baş verməyəcək. Eynilə bunun kimi bölgələrdə sanitar qovşağı çöldə olan və ya ümumi mətbəxi olan evlərin satışı məsələni çətinləşdirir. Dediyimiz kimi insanları bər-bəzək deyil, mənzilin yerləşmə yeri və bir də ki rahatlığı maraqlandırır.
Evin uzun müddət satılmamasının səbəblərindən biri də düzgün olmayan layihələndirmədir. Məhz bu səbəb evin daşınmaz əmlak bazarında uzun müddət qalmasına səbəb olur. Bəzi mənzil sahibləri bir otaqlı evdən xırda üç otaqlı mənzil yaratmağa çalışırlar. Və qiymətini də qaldırıb üç otaqlı mənzilin qiyməti edirlər. Alıcı mənzilə baxışa gələndə sözsüz ki, bəyənmir, şünki eyni qiymətə daha geniş üç otaqlı mənzil ala bilər. Heç zaman alıcılarınızı aldatmağa çalışmayın. Unutmayın ki, heç kim bir dəfədən ev almır, hər kəs onlarla mənzilə baxıb, yüz ölçüb bir biçib, daha sonra qərar qəbul edirlər. Siz də elə etməlisiniz ki, mənziliniz yadda qalan olsun.
Bəzən də sonuncu mərtəbədə mənzilə sahib olanlar təmirsiz olan, lifti işləməyən mənzili eynilə o biri təmirli mənzillərn qiymətinə satmaq istəyirlər. Baxış zamanı alıcı məntiqli olaraq, qiyməti endirməyə çalışır, əgər siz heç bir endirimə razı olmasanız, inanın ki, eviniz uzun müddət satılmayacaq.
Çalışın elan yerləşdirdikdə doğru məlumatlar yerləşdirin, tələsib ünvanı, əlaqə nömrələrinizi səhv daxil etməyin, elanları fotosuz yerləşdirməyin.
Sonda qeyd edək ki, mənzilin daşınmaz əmlak bazarında uzun müddət asılı qalması, əsasən mənzil sahibindən asılıdır. Buna görə çalışın mənzilinizə düzgün qiymət verin. Ancaq ümumidə qiymətində iyirmi-otuz faiz endirilmiş mənzillər öz real alıcılarını tez bir zamanda tapırlar.