1 otaqlı evi kirayə vermək üçün necə genişləndirməli
İstər evi satmaq, istər onu kirayə vermək istəyənlər və ya ümumiyyətlə 1 otaqlı evini düzgün şəkildə genişləndirmək istəyənlər üçün bu məqalə düşünürük ki, maraqlı olacaq. Bəzən elə olur ki, mənzil almaq istəyən vətəndaşlar minimum 1 yataq otağı və üstəlik qonaq otağı da istəyirlər. Evə gələn qonaqları həl halda heç kəs yataq otağında otuzdurmaq istəməz.
Lakin vətəndaşın pulu yalnız 1 otaqlı ev almağa kifayət edir. Nəticədə o, sanitar qovşağından, dəhlizdən, yataq otağından, mətbəxdən və eyvandan ibarət bir ev əldə etmiş olur. Belə olduğu halda nə etməli? 1 otaqlı evi genişləndirməyin bir neçə yolu var. Üstəlik 1 otaqlı mənzilin genişliyi onu daha çox hissələrə bölünməsinə xidmət edir. Bu haqda gələn məqalələrimizdə danışacağıq. Hal-hazırda söhbət kiçik ölçülü 1 otaqlı mənzillərin dəyişilməsindən gedəcək. Deməli, keçək mətləbə. Nümunə üçün aşağıdakı çertyoju götürək.
1. Bildiyimiz kimi əsas yük daşıyan sütunlara toxunmaq olmaz. Ancaq aralıq divarlarda dəyişiklik edə bilərik. Burada eyvan sütunlarından başqa digər arakəsmələrə əl gəzidiriləcək. Dəhliz ilə sanitar qovşağnın qonşu divarına dolab yerləşdirəcəyik.
2. Mətbəx ilə yataq otağı arasına əlavə qonaq otağı yerləşdiririk. Bunu həm mətbəxin, həm də yataq otağının sahələrini azaltmaqla edirik. Əslində qonaq otağımız dediyimiz tam şəkildə otaq sayılmır. Mətbəx ilə qonaq otağının birləşməsi – studio alınır. Yataq otağında iki nəfərli yataq, dəhliz ilə qonşu olan divara dolab yerləşdiririk. Yataq otağı ilə qonaq otağını ayıran arakəsməyə televizor və audiosistem, onunla üzbəüz isə açılan divan yerləşdirmək olar. Mətbəxdə isə mebelləri künc hissədə quraşdıraq. Beləcə kifayət qədər sərbəst yerimiz qalacaq.
3. Sanitar qovşağını isə dəhlizin və mətbəxin hesabına böyüdək. Sanitar qovşağı ilə mətbəx arasındakı arakəsməni maili formada edərək sahəmizi genişlədirə bilərik. Bundan başqa künc hissədə duş kabinəsi quraşdırmaq olar.
Bu oldu bizim birinci variatımız. İndi isə eyni evə ikinci variantı tətbiq edək.
1. Bütün arakəsmələri ləğv edirik. Eyvanın qapılarını sökürük, isidirik və digər otaqlarla biləşdiririk. Mətbəxi yataq otağına köçürürük. Bütün lazımi boruları döşəmənin altı ilə aparırıq.
2. Mətbəxin yerində isə əksinə yataq otağı yerləşdiririk. Yataq otağının yanında, eyvanın divara yaxın olan hissəsində dolab düzəldirik. Sanitar qovşağını genişlədirib həm yataq otağından, həm də dəhliz tərəfdən qapı qoyuruq.
3. Dəhlizdə divar hissədə üst paltarlar üçün dolab quraşdırırıq. Dəhliz ilə mətbəxi vizual olaraq metlax vasitəsilə ayırmaq olar. Mətbəx ilə qonaq otağını birləşdirərək eyni bir otaq edirik. Mərkəzdə dairəvi yemək stolu yerləşdirə bilərik. Studionun digər küncündə kiçik kofe stolu və onunla üzbəüz divan yerləşdirərək çox rahat bir istirahət guşəsi yarada bilərik.
1 otaqlı mənzilin genişləndirilmiş versiyası bununla bitmir. Bundan başqa digər müxtəlif variantları da fikirləşib tapmaq olar. Lakin nəzərə alın ki, yeni tikili binaların hal-hazırda bir çoxunda müqaviləyə əsasən mənzillərə sonradan dəyişiklik etmək mümkün deyil.
Buna görə də yeni tikili binada 1 otaqlı ev alıb sonra dəyişmək istəsəniz bunu tikinti şirkəti ilə əvvəlcədən danışmanız lazımdır. Tikinti şirkəti sonrakı dəyişikliyə icazə verməməsinə əsas səbəb kimi şirkətin yaratdığı imicin pozulmasını gətirir. Bu daha çox irimiqyaslı layihə şəklində bina tikən tikinti şirkətlərinə aiddir.
Bundan başqa edilən dəyişiklik zamanı binanın tikildiyi materialları da nəzərə alın. Bəzi binalar var ki, misal üçün panel beton bloklardan tikilənlər onların arakəsmələrini dağıtmaq sizin xeyli vaxtınızı alacaq. Yenə də əgər 1 otaqlı mənzilinizi genişləndirmək fikrinə gəlmisinizsə, o zaman bu haqda çalışın ilk öncə kifayət qədər məlumat toplayın.
