Tələbələr kirayə evləri necə seçməlidir?
İmtahan verib universitetə daxil olmaq məsələnin çətin tərəfidir. İmtahan cavabları çıxandan və müsbət cavab aldıqdan sonra sanki, gələcək tələbələrin çiyinlərindən ağır yük atılır. Artıq dərindən nəfəs almaq olar. Bakıda yaşayanlar üçün artıq oturub dərs ilinin başlanmasını gözləmək kifayət edir. Ancaq əyalətdə qalanlar, əsasən də Bakıdakı universitetlərə daxil olanlar üçün növbətə kirayəyə mənzil seçmək də qalır. Dörd il universitetdə oxuduqları bir vaxtda qalmağa mənzil tapmaq lazımdır. Bəs kirayə mənzili harada axtarmalı və necə tapmalı? İlk baxışdan mənzil seçimi asan görünə bilər.
Paytaxta ilk dəfə uzun müddətli qalmağa gələn gənc tələbənin fikirləri bir müddət xəyali dünyada olduğuna görə, mənzil seçimində tələsik davranıb, yanlış qərar verə bilər. Bu yanlış qərardan maksimum dərəcədə uzaq olsunlar deyə, bu məqaləni yazmağa qərarə gəldik.
Tək bir tələbənin evi kirayə götürməsi bahalı sayılır. Adətən bir evi 4-5 nəfər ortaqlı şəkildə götürüb, birgə qalırlar. Bu zaman hər kəsin çiyninə az yük düşür. Nəzərə alın ki, Bakıda mənzilləri bu cür formada bəzən yalnız qızlara verirlər. Bu da oğlanların səliqəsiz olmaları fikrindən irəli gələn bir şablondur.
Evi seçərkən, çalışın məsələni telefon danışığı üzərindən həll etməyəsiniz. Pul haqqında isə ümumiyyətlə razılığa gəlməyin. Mütləq şəkildə mənzil sahibi ilə görüşüb, evi yaxşıca gəzin. Ola bilsin ki, internet üzərindən reklam olunan mənzil heç cürə reallığa uyğun olan mənzil deyil. Bu cür məsələlərdə diqqətli olun. Mənzilə baxış zamanı sevindiyinizi biruzə verməyin. Ev sahibi bundan istifadə edib, mənzilin qiymətini qaldıra bilər. Evi gəzərkən, çox tənqid də etməyin.
Əks təqdirdə, mənzil sahibi artıq ilk gündən sizi mənfi birisi kimi qəbul edər və evi sizə verməz. Evə baxış zamanı yanınızda valideyninizi və yaşca böyük hər hansı bir qohumunuzu götürə bilərsiniz. Birincisi, sizin kirayə pulunuzu ödəyən valideyninizin yaşayacağınız evi görməyi onun tam haqqıdır, ikincisi də mənzil sahibi böyükləri aldatmaqdan çəkinərlər.
Mənzili seçərkən çalışın universitetinizə yaxın bir yer olsun. Bəzən tələbələr ucuz olsun deyə şəhərdən kənar yerdən ev götürürlər, ancaq bu zaman sizin yol xərciniz çox olacaq, üstəlik yol sizi elə yoracaq ki, dərs oxumağa nə halınız, nə də ki, vaxtınız qalmayacaq. Əgər ailənizin imkanı aşağıdırsa və siz onlara yük olmaq istəmirsinizsə, bunun üçün tələbə yataqxanalarını və ya özünüz kimi başqa tələbələrlə ortaq qalmağı seçə bilərsiniz. Bu məsələdə də otaq yoldaşı seçərkən, diqqətli olun. Çalışın sizinlə eyni xasiyyətdə olan biriləri ilə qalın. Çünki dörd il müddətində siz o şəxslərlə birgə yaşayacaqsınız.
Əgər qalacağınız evi seçmisinizsə, çalışın mənzil sahibi ilə iki tərəfli müqavilə bağlayın. Bəzən elə olur ki, mənzil sahibləri onların evlərinin kirayə verilməyindən bixəbər olurlar və ya bir mənzili bir neçə nəfərə kirayəyə verirlər. Müqavilə bağlandığı müddətdə ev demək olar ki, sizin olur. Yəni o mənada ki, sizi o evdən heç kimin qovmağa, kirayə haqqını qaldırmağa ixtiyarı olmayacaq.
Qaldığınız yerdə çalışın, qonşular ilə normal münasibət saxlayasınız. Yəni, nə onlardan uzaq gəzməyin, nə də ki, onlarla münaqişəyə daxil olmayın. Əks halda qonşular bu barədə mütləq şəkildə ev sahibinə şikayət edəcəklər.
Bakıda mənzillər daha çox ailəli olan insanlara verildiyi üçün və yuxarıda qeyd etdiyim kimi oğlanlara səliqəlilik cəhətdən etibar etmədikləri üçün müqavilə əsasında siz ev sahibini evi tam şəkildə səliqəli saxlayacağın barədə öhdəlik götürsəniz, düşünürəm ki, məzili kirayə əldə edə bilərsiniz. İstənilən halda getdiyiniz evi səliqəli saxlayın, bu ilk öncə özünüzə və ev sahibinə göstərdiyiniz hörmətdir. Ev sahibi isə istənilən vaxt evə baş çəkə bilər. Çalışın müsbət təsir bağışlayasınız.
