Mənzilimizin təmiri zamanı nələrə diqqət etməliyik
Mənzil təmiri işini iki yerə ayırmaq lazımdır: yeni tikili binalardakı mənzillərin ilkin təmiri və köhnə binalardakı mənzillərin təkrar təmiri. Bu iki işin bir-birindən fərqli cəhətləri var. Belə ki, yeni tikilmiş binadakı mənzili təmir edərkən hər şey başdan dizayn edilir, qurulur. Bu, bir qədər çox zaman aparsa da işə əlavə heç nəyin maneçilik törəməməsi səbəbindən sərfəlidir.
Çünki köhnə binalardakı mənzillərdə sizdən əvvəlki təmirin kim tərəfindən və necə aparılması sual altındadır. Bəzən sizə asan və vaxt aparmayan görünən bir işin altından başqa bir problem çıxaraq təmirin müddətini uzada bilər.
Ümumilikdə, hər iki halda diqqət ediləsi məqamları aşağıdakılar hesab etmək olar:
- Ən vacib məqam olan təmiri aparan ustaların düzgün seçilməsi. Bəzən bir usta sizə bütün işləri özünün görməyini təklif edə bilər. Lakin yadda saxlamaq lazımdır ki, belə ustalar əksər hallarda professional olmur. Qənaət etdiyinizi sanaraq onlara gördürdüyünüz işdə sonradan problemlər yarana və ikinci dəfə xərcə səbəb ola bilər. Buna görə də hər bir işin öz professionalını tapmağa çalışın. Əlbəttə, burada maddi faktorlar da nəzərə alınmalıdır;
- Təmir üçün düzgün və keyfiyyətli ləvazimat, materiallar və aksesuarların seçilməsi. Yəhudilərin belə bir misalı var: “Simic insan iki dəfə ödəyir.” Yəni diqqət yetirmək lazımdır ki, təmir üçün aldığımız mallar keyfiyyətli olsun. Bu, əlbəttə ki, öz növbəsində həmin malların qiymətində də özünü büruzə verəcək. Lakin ucuz və keyfiyyətsiz materiallarla edilən təmirin ömrü qısamüddətli olub, sizi iki dəfə salacağı halda, öz növbəsində keyfiyyətli və qiyməti bir qədər baha olan olan materiallar isə sizə uzunmüddət korlanmayan təmir etməyə imkan verər. Hər halda orta və az gəlirli ailələrin mənzillərini tez-tez təmir etməyə imkanı çatmaz. Bundan başqa keyfiyyətli materiallar həm də ekoloji baxımdan təhlükəsiz və evdə yaşayanların sağlamlığı üçün də əlverişli olar. Buna görə də əvvəlcədən işinizi sağlam və möhkəm görməyə üstünlük verməlisiniz. Üstəlik, keyfiyyətli materiallarla edilən təmir gələcəkdə mənzilinizi satmaq və ya kirayə vermək istəsəniz sizə daha çox gəlir gətirə bilər, çünki bu cür mənzillərin qiyməti həmişə digərlərindən daha çox olur;
- Digər təmir işlərinə keçməzdən öncə istilik, kanalizasiya, elektrik və digər kommunikasiya xətlərinin düzgün çəkilməsindən əmin olun. Çünki bu xətlərin çəkilməməsi və ya düzgün çəkilməməsi gələcəkdə bir çox problemlərə və yenə də təkrar xərclərə səbəb ola bilər.
- Təmir zamanı görülən bütün işlər təhlükəsizlik standartlarına və hesablamalara əsasən aparılmalıdır. Bu standart və hesablamalar əvvəlcədən tərtib edilmiş layihədə əks edilməli və bütün işlər də bu layihəyə əsaslanmalıdır. Evin dizaynı, əşyaların necə yerləşdirilməsi əvvəlcədən müəyyən edilməlidir ki, kommunikasiya xətləri də ona uyğun çəkilsin. Məsələn, televizor, kondisioner, paltaryuyan, qabyuyan və s. kimi əşyalar üçün xüsusi elektrik xətləri əvvəlcədən çəkilməlidir ki, sonradan problem yaranmasın.
- Ümumiyyətlə, görülən hər bir işdə insani faktorlar birinci yerdə dayanmalı və heç bir iş digər insanlara zərər verməməli və narahatçılıq gətirməməlidir. Bu baxımdan təmir işi də istisna olmamalıdır. Təmir zamanı bir sıra işləri görərkən müəyyən yazılmamış qaydalara riayət etmək lazımdır. Ətrafdakılara narahatçılıq yaradacaq səsə səbəb olan təmir işləri səhər saat 9-dan əvvəl, axşam saat 7-dən sonra, şənbə və bazar günləri görülməməlidir. Çünki bu, qonşuların istirahətinə mane ola bilər. Bundan başqa təmirin səbəb olduğu zibillər vaxtlı-vaxtında yığışdırılmalı, materialların daşınması zamanı blokun, liftin və mənzilin qarşısının təmiz saxlanılmasına diqqət edilməlidir. Bu şərtlərə düzgün əməl edilməsi gələcəkdə qonşularla mehriban münasibətin qarantı olar.
Təmir etdiyiniz mənzildə xoşvbəxt yaşamanızı diləyirik!