6 addımda haradan ev alacağınıza qərar verin.
Yeni ev sahibi olmaq hər kəsin xəyalıdır, ancaq həyatınızın daha rahat və komfortlu olması üçün ev alarkən bəzi meyarlara xüsusilə diqqət yetirməlisiniz. Evinizin genişliyi və gözəlliyi, əlbəttə ki, önəmlidir, lakin yeni ev almağın həyatınıza gətirəcəyi digər dəyişiklikləri gözardı etməməlisiniz. Alacağınız evin yerləşdiyi mühit ən az digər faktorlar qədər həyatınıza təsir göstərəcək. Buna görə də həyatınızın geri qalanını keçirəcəyiniz evi seçərkən evin yerləşdiyi əraziyə də diqqət göstərməyə çalışın. Sizin üçün haradan ev alacağınıza qərar verərkən diqqət yetirməli olduğunuz 6 məqamı bu yazıda topladıq.
1. Nəqliyyat vasitələrindən rahat istifadə
Ev alan hər kəsin başlıca olaraq diqqət yetirdiyi məsələ nəqliyyat vasitələrindən istifadənin rahat olub olmamasıdır. Bu barədə sizə xırda bir tövsiyə daha vermək istərdik. Evinizin hər hansı bir nəqliyyat vasitəsi yox, məhz sizin və ailə üzvlərinizin iş yerinə gedərkən rahatlıqla istifadə edə biləcəyi nəqliyyat vasitələrinə yaxın olmasına diqqət yetirin. Evinizin yaxınlığında metro stansiyasının olmağı siz ondan istifadə etməli olmadığınız təqdirdə heç bir işə yaramayacaq.
2. Piyada gediş-gəlişlərə əlverişli olması
Düzdür, nəqliyyat vasitələri həyatımızı rahatlaşdırır, ancaq hər yerə nəqliyyat ilə getməyin mümkün olmadığı da bir reallıqdır. Buna görə də, seçəcəyiniz evin yaxınlığında mütləq piyada gedə biləcəyiniz yerlərin olmasına diqqət yetirin. Xüsusilə də, məktəb, market, xəstəxana kimi yerlərə yaxın ərazidə ev seçməyə çalışın. Bununla həm özünüzün, həm də ailə üzvlərinizin həyatını rahatlaşdırmış olacaqsınız. Nəzərə alın ki, heç kim gündəlik alış-veriş üçün uzaq məsafəyə getmək istəməz.
3. Sosial həyata uyğunlaşmaq
Əgər sosial həyatınızda tez-tez qatıldığınız və ya qatılmaq istədiyiniz fəaliyyətlər varsa, seçdiyiniz yerin ona uyğun olması üçün çalışın. Evinizin yaxınlığında idman zalı olsa, bəlkə də, illərdir planlaşdırdığınız idman məşğələlərinə başlayacaqsınız. Və ya böyük bir film həvəskarısınızsa, evinizin yerləşdiyi səmtdə kinoteatrların olması sizin üçün lap göydəndüşmə olacaq. Yaxud qəhvə içməyi sevən birisinizsə, səhər işə gedərkən yolüstü qəhvə ala biləcəyiniz bir yerin olmağından daha yaxşı nə ola bilər? Yeni ev seçərkən çox vaxt bu kimi şeylərə diqqət yetirilməsə də, unutmayın ki, məhz evinizin yerləşdiyi sosial mühit həyatınızdakı bu dəyişikliyə tezliklə uyğunlaşmağınıza və özünüzü daha yaxşı hiss etməyinizə köməklik göstərəcək.
4. Təhlükəsizlik
Yeni ev seçərkən ən çox diqqət etməli olduğunuz məsələ evinizin yerləşdiyi ərazinin təhlükəsiz olmasıdır. Seçdiyiniz səmtin təhlükəsiz olub olmadığı barədə orada yaşayan insanlardan məlumat almağa çalışın. Əgər ailənizdə kiçik yaşlı uşaqlar varsa, evinizin pəncərələrində dəmir barmaqlıqların olub olmadığını mütləq yoxlayın. Evin yaxınlığında uşaqlar üçün oyun parkları varsa, parkın nəqliyyat yolundan uzaq olmasına diqqət yetirin.
5. İnvestisiya dəyəri
Yeni eviniz sizin və ailənizin həyatında mənəvi cəhətdən çox dəyərli rol oynayacaq, amma işin iqtisadi tərəfinin olduğunu da unutmayın. Aldığınız hər bir əmlak sizin öz gələcəyinizə qoyduğunuz yatırımdır. Buna görə də, həyatınızın bu ən önəmli qərarını verərkən tələsik hərəkət etməməlisiniz. Unutmayın ki, bir evin dəyərini müəyyənləşdirən ən başlıca ünsür onun yerləşdiyi ərazidir. Buna görə də, yeni ev almadan öncə yaşadığınız şəhərdəki bütün əraziləri araşdırın və əmlak dəyərinin düşməsi ehtimal edilən yerlərdən ev almamağa çalışın. Bu, sizin maddi olaraq zərər etməyinizə səbəb olacaq. Əksinə, əgər əmlak dəyəri getdikcə qalxan yerlərdən ev alsanız, bu zaman illər sonra indikindən daha yüksək qiymətə satılacaq evi çox ucuz qiymətə əldə etmiş olacaqsınız.
6. Başlıca tələbatlarınızın qarşılanması
Yeni ev axtararkən xəyallarınızdakı kimi evlə qarşılaşmaya və ya ev almaq istədiyiniz ərazinin büdcənizə uyğun olmadığını görə bilərsiniz. Ruhdan düşüb tələsik qərar verməyin. Yaşayacağınız yerlə bağlı başlıca istəklərinizi müəyyənləşdirin və bundan kənara çıxmamağa çalışın. Əsas tələbatlarınıza cavab verməyən yerlərdən büdcəniz üçün sərfəli olsa belə, uzaq durmağa çalışın. Özünüzün və ailənizin mənafeyi üçün ən uyğun seçimi etməyə çalışın.
