Sanitar qovşağının təmiri zamanı ən çox edilən səhvlər

Mənzilini satmağı düşünən mənzil sahibi evinin ən çox düşündürən məsələlərdən biri, mənzilin hansı hissəsinin daha yaxşı təmir olunmasıdır. Yəni evə baxmağa gələn potensial alıcı mənzili daha çox hansı kriteriya üzrə qiymətləndirir. Nəyə daha çox fikir vermək lazımdır, nəyə çox da vaxt sərf etməyə dəyməz. Mənzilin əsas baxılan hissələrindən demək olar ki, ilki sanitar qovşağıdır. Bəzən sanitar qovşağının rahatlığı və təmizliyi ev alqı-satqısında çox vacib rol oynayır. Buna görə də bu mövzu hər zaman aktualdır. Sanitar qovşağının əksikləri olmasın deyə hər şeyi qabaqcadan düzgün planlaşdırmaq lazımdır. Təmirdə edilən xırda səhv sonradan çox pis şəkildə üzə çıxa bilər və siz gördüyünüz işi ya yenidən görməli olacaqsınız, ya da etdiyiniz səhv ilə barışacaqsınız. Necə deyərlər, ehtiyat igidin yaraşığıdır. Buna görə də təmirə başlamazdan qabaq ən çox edilən səhvlər haqqında bilmək gərəkdir.

Gəlin, ilkdən başlayaq. İlk edilən səhvlərdən biri sanitar qovşağının mebel və avadanlıqlarının seçimi və quraşdırılması olur. Ev sahibi bazara gedib müxtəlif çeşidli məhsullar gördükdə, ölçülər barədə bəzən unudurlar. Nəticədə xoşagəlimli mebellər onsuz da kiçik olan sanitar qovşağını daha da kiçildir və orada sərbəst hərəkət trayektoriyasını məhdudlaşdırır. Bu da qəbul edin ki, heç xoşagələn hal deyil. Daha sonra avadanlıqların və santexnika borularının quraşdırılma hündürlüyüdür. Bəzən elə olur ki, ev sahibi hər şeyi öz boyuna görə ölçür, amma evdə ailə tutalım beş nəfərdən ibarətdir. Və bu beş nəfər də hərəsi fərqli yaşda və boydadır. Buna görə də quraşdırma işləri apararkən, hündürlük orta boylu insanın ölçüsü götürülür.

İstifadə olunacaq tikinti materiallarının sayını hesablayarkən, çalışın diqqətli olasınız. Hesabı üç-dörd dəfə təkrarlayın, amma çalışın ki, son nəticədən əmin olasınız. Sonda aldığınız qiymətdən əlavə olaraq on-on beş faiz daha artıq tədarük görün. Bu, əsasən kafel və ya metlaxa aiddir. Bəzən düzülüş zamanı kafel kəsilir və ola bilsin ki, sonda kifayət etməsin. Çatmayan kafel üçün əvvəlcə aldığınız mağazaya getsəniz, orada eyni bəzəkli kafeli tapmaya da bilərsiniz. Buna görə də ehtiyat etmək heç zaman qorxulu deyil.
Çalışın sanitar qovşağına ən azı iki ədəd elektrik yuvası quraşdırasınız. Sanitar qovşağında sizə su qızdırıcısı, fen, üz qırxan maşın üçün əlavə elektrik yuvaları lazım ola bilər. Sonrada ora onları əlavə etmək çox vaxtınızı və pulunuzu alacaq və nəticədə estetik baxımdan da ziyan vura bilər. Elektrik yuvalarını qabaqcadan quraşdırmaq daha yaxşı olardı. Nəzərə alın ki, sanitar qovşağında daimi su olur, buna görə də xüsusi qoruyucu qapaq ilə bağlanan yuvaları seçin.

İsti döşəmə son illərdə ölkəmizdə getdikcə məşhurluq qazanır. Bu sistemi quraşdıracağınız təqdirdə onu yaxşıca hidroizolyasiya edin və sanitar qovşağında olacaq mebellərin yerləşmə yerlərini nəzərə alın. Çünki əgər mebellər isti döşəmədən on santimetr uzaqlıqda olmasa, istidən quruyub çatlayacaqlar.

Çalışın son işlərdə səthi sürüşkən, parlaq metlax ilə örtməyəsiniz. Düzdür bu cür metlaxlar gözə xoş təsir edirlər. Ancaq sürüşkənlik baxımından təhlükə yarada da bilərlər. Seçiminizi sürüşməyən materiallar üzərində saxlaya bilərsiniz. Bəzən kiçik bir xalça da sürüşkənliyi azaldır, amma yenə də xalça sürüşkən səth üzərində dayanmış olur.

Sanitar qovşağı hər zaman nəm və isti olan bir yer sayıldığı üçün tavanın təmiri zamanı bunu nəzərə almağınız vacibdir. Nadir halda tavana gipskarton vururlar, düşünürlər ki, o həm daxildəki nəmdən qoruyar, həm də yuxarı qonşudan gələn suyu özünə hopdurar. Ancaq unudurlar ki, suyu özünə hopduran gipskarton müəyyən müddətdən sonra formaca deformasiyaya uğrayır və yaxşı görkəmini itirir. Bu cür tavanlarda nəmişliyə davamlı xüsusi materiallardan istifadə etmək məsləhətdir. Həm daxili divarı içəridəki nəmdən qoruyur, həm də yuxarıdan axa biləcək suyu saxlayıb çölə tökülməyə qoymur. Yığılıb qalan suyusa sonradan oradan təmizləmək çətin olmur.