Həyət evi tikərkən nədən başlamaq lazımdır?
Bina evləri ilə paralel həyət evlərinə üstünlük verən vətəndaşlar da var. Həyət evlərinə üstünlük verənlərin müxtəlif cür izahları olur, bu, hündür mərtəbədən qorxma, yuxarı mərtəbədə qonşunun olmaması, həyətyanı sahənin olması, kənd abuhavası və s. ola bilər. Bina evlərində mənzil əldə etmə prosesi xeyli asandır, pulunu verdin, mənzili aldın. Binanın tikintisində iştiraka gərək yoxdur. Ancaq öz evini sıfırdan tikmək istəyən vətəndaş nə etməlidir? Nədən başlamalıdır? Çalışacağıq buna aydınlıq gətirək. Həyət evi tikmək üçün ilk öncə evin yerləşəcəyi torpaq sahəsi olmalıdır. Elə etmək lazımdır ki, alacağınız torpaq sahəsi digər yaşayış evlərinə yaxın olsun. Bu, su, işıq, qaz xəttlərinin çəkilməsi prosesini asanlaşdıracaqdır. Torpaq sahəsinin evə olan nisbəti 10:1-ə olmalıdır. Çalışın torpaq sahəsini nə böyük, nə də ki kiçik seçməyin. Böyük torpaq sahəsinə baxmaq çətin olur, kiçik torpaq sahəsi isə sizə gələcəkdə genişlənməyə imkan verməyəck.
Bizdə bu cür hallar nadir şəkildə görünsə də, məsləhətdir ki, torpaq sahəsini almamışdan qabaq geodeziya mütəxəssisləri ilə məsləhətləşəsiniz. Onlar adətən gəlib sahədən qruntun, suyun nümunəsini götürüb, analiz edirlər. Nəticədə gələcəkdə qoyulacaq bünövrənin hansı tipdə olacağı müəyyənləşəcək. Əgər mütəxəssis məsləhəti sizə gərək deyilsə, o zaman yaxınlıqdakı qonşulardan məlumat toplaya bilərsiniz. Torpaq alarkən, çalışın zibilxanalardan, bataqlıqdan uzaq olsun, əraziyə texniki qurğular daxil ola bilsin, sosial infrastruktura yaxın olsun və s.
Torpaq məsələsi həll edildikdən sonra ikinci mərhələ layihə mərhələsidir. Hal-hazırda internet üzərində kifayət qədər pulsuz şəkildə çertyojlar var. Oradan daxil olub yükləyə bilərsiniz. Və ya sıfırdan mütəxəssislərə müraciət edib, yeni layihə sifariş edə bilərsiniz. Lakin heç bir halda layihəni özünüz hazırlamağa çalışmayın. İlk baxışdan öhdəsindən gələ biləcəyinizi zənn etsəniz belə, sonradan xoşa gəlməz hallarla qarşılaşa bilərsiniz. Nəticədə bünövrə qoyulduqdan sonra dəyişiklik etmək istəsəniz, bu, sizin həm vaxtınızı, həm də əlavə pulunuzu alacaq. Üstəlik layihə qurulmamışdan qabaq bilməli olacağınız şeylər bunlardır: eviniz neçə otaqlı olacaq, mətbəx və qonaq otaqlarının ölçüləri, eviniz bir, yoxsa bir neçə mərtəbəli olacaq, büdcəniz hansı civarda olacaq, evin daimi sakinlərinin sayı və s. Əgər tez-tez qonaq qəbul edirsinizsə, o zaman qonaq otağınn ölçüsünü geniş götürməyiniz, yox əgər qohumlarınız tez-tez sizdə qalırlarsa, o zaman əlavə yataq otaqları əlavə etməyiniz məsləhətdir. Nəhayət bunların hamısını dəqiqləşdirdikdən sonra, layihəçi mütəxəssis ilə məsləhətləşib layihənin çertyojunu almağınız lazımdır.
Ardınca tikinti barədə yerli idarəetmə orqanlarından yazılı şəkildə icazə almalısınız. Əgər evi icazəsiz tiksəniz, sonradan onun sökülmə təhlükəsi var. İcazə üçün sizin şəxsiyyət vəsiqəniz, evin layihəsi, torpaq sahəsinin sahibi olduğunuzu təsdiq edən sənəd, adminstrasiya müdirinə müraciət sənədi və s. lazımdır. Qaz və elektrik xəttləri barədə yanğın müfəttişliyi ilə razılaşmalısınız. Evin layihəsinin sənədini və bu layihəni quran şirkəti təqdim etməlisiniz.
İcazə alındıqdan sonra evi tikmək olar. İlk öncə bünövrə üçün buldozer və ekskavator ilə özül qazılır və özülün içi əl ilə təmizlənir. Məsləhətdir ki, bünövrəni özül qazıldıqdan dərhal sonra qoyasınız. Əks halda özül dolub əlavə vaxtınızı ala bilər. Özülə ilk öncə 10 santimetr hündürlüyəndə çınqıl tökülür (bəzən bu, qum da ola bilər), çınqılın üzərinə bitum əlavə olunur. Daha sonra taxtabənd qurulub, armatur setka yerləşdirilir və üzərinə beton tökülür. Betonun qurumağını gözləmək lazımdır. Bu, vacib amillərdən biridir. Sonra həmin beton üzərində divarlar inşa olunur. Ən sonda dam örtüyü qurulur. Dam örtüyünü seçərkən, yağış küyünü və yanğın təhlükəsizliyini nəzərə almaq lazımdır.
