Evlərini satmaq istəyənlər onun qiymətini necə öyrənə bilərlər?

Bəzən elə olur ki, yaşadığınız yer böyüməkdə olan ailəniz üçün kiçik olur və ya yenicə düzəldiyiniz iş yerinə uzaq olur. Bu zaman köhnə evi satıb yenisini almağı düşünürsünüz. Satmağa qərara gəldiyiniz vaxt təbii ki mənzilə müəyyən bir qiymət qoymalı olacaqsınız. Lakin mənzili satışa çıxardığınız vaxtdan xeyli müddət keçir, lakin heç bir alıcı nə zəng etmir, nə də ki qapınızı döymür. Bu cür durğunluğun əsas səbəblərindən biri mənzilə qoyduğunuz qiymətdir. Anlaşılandır ki, satıcı mənzili satarkən maksimum gəlir əldə etməyə çalışır, amma unutmayın ki, alıcı da bunu qiyməti endirməkdən ötrü istifadə edir.

Satacağınız evin qiymətini dəqiqləşdirməzdən qabaq ilk öncə bu qiymətə hansı amillərin təsir etdiyini bilməyiniz lazımdır:

1. Mənzilin yerləşmə yeri, onun şəhərin mərkəzindən uzaqlığı;
2. Mənzilin sahəsi;
3. Mənzilin vəziyyəti (təmirlidir, ya təmirsiz);
4. Mənzilin tikilmə üslubu (monolit, panel və ya kərpic)
5. Mərtəbə

Bundan başqa digər amillər də var ki, mənzilin qiymətinə təsir göstərirlər. Misal üçün, iri mətbəx və ya sanitar qovşağı və s.
Mənzilizin qiymətini öyrənmək üçün mənzillərin alqı-satqısı olan saytları tapın və axtarış sistemində sizin mənzilinizə uyğun digər mənzillərin qiymətlərinə baxın və müqayisə edin. Adətən bu cür axtarış sistemlərində xüsusi filterlər olur. Məsələn, siz mənzilin yerləşdiyi şəhəri, onun sahəsini, mərtəbəsini qeyd etməklə rahatlıqla tapa bilərsiniz. Unutmayın ki, bəzən elanları maklerlər yerləşdirirlər və ora mənzilin real deyil, endirilmiş qiymətini yazırlar ki, mənzilə maraq çox olsun.

Elanda qeyd olunan mənzil reallıqda hətta olmaya da bilər. Yəni, nə vaxtsa olub, satılıb, lakin mənzilin qiyməti ucuz olub deyə makler o elanı saytdan götürməyib. Potensial alıcı ucuz qiymət görüb cəld zəng edir, nəticədə məlum olur ki, həmin mənzil satılıb. Lakin makler o versiyaya yaxın bir neçə mənzil sadalayır, lakin bu dəfə nisbətən baha qiymətə və ola bilər ki, alıcı o mənzili alır.

Ancaq evi maklerdən deyil, birbaşa ev sahibindən alırsınızsa, o zaman daha baha qiymətə ala bilərsiniz. Bununla qarşılaşmamaq üçün bəzi tədbirlər görmək lazımdır. Birincisi mənzilin qiymətinə baxın, tutalım, əgər sizin şəhərinizdə 2 otaqlı mənzilin qiyməti 50 000 AZN-dirsə, o zaman elanda bunu 25 000 AZN və ya 75 000 AZN görsəniz, o zaman narahat olmağa dəyər. Birincisində siz tamamilə təmirsiz, bərbad vəziyyətə ev ilə, ikinci halda isə evin ucuz olmasına baxmayaraq, ev sahibinin evin təmirinə çoxlu pul xərcləyib, sonra onu daha da baha qiymətə satmaq istəyi ilə qarşılaşa bilərsiniz.

Buna görə də əgər qiyməti özünüz qoyursunuzsa, o zaman çalışın bu qiymət həqiqətə uyğun olsun. Yox əgər yenə də çətinlik çəkirsinizsə, o zaman bir neçə ev alqı-satqısı ofisinə yaxınlaşıb maklerlərə alıcı kimi bəzi suallar verib, öz fikrinizdə orta qiymət çıxara bilərsiniz. Maklerlər ev satışlarından komisyon haqqı aldıqlarına görə siz onlar üçün potensial alıcısınız. Buna görə də sizi itirməmək üçün həmin ərazidəki mənzillər barədə istənilən sualınızı həvəslə cavablandıracaqlar.

Əgər tamamilə əlacsız qalsanız, mənzili qiymətləndirən mütəxəssislər var ki, onların xidmətindən istifadə edə bilərsiniz. Xidmət deyiriksə, əlbəttə ki, burada pul qarşılığındakı xidmətdən danışmıq oluruq. Siz mütəxəssisi mənzilinizə dəvət edirsiniz, o, mənzilin fotolarını çəkir və gedir. Müəyyən müddətdən sonra mənzilin xarakteristikası barədə sizə zəng edib məlumat verir. Bəzən elə olur ki, mənzili satmaq üçün ona ümumi təmizlik işləri və xırda kosmetik əməliyyatları aparmaq kifayət edir.