İnternetin  faydaları

İnternetin  faydaları

Getdikcə qloballaşan,dəyişən bir dünyada yaşayırıq.İstər sosial-iqtisadi, istər, mədəni   münasibətlərin formalaşmasında internetin rolu danılmazdır.İş və biznes mühitinin təşkili, təhsil və təlim, özünü inkişaf və s. istiqamətlərdə rahatlığın təmin edilməsində ən böyük köməkçimizdir internet.                                                                                                                      Əksər evlərdə qlobal şəbəkəyə-internetə qoşulmuş kompüterlərin olduğu mütləqdir. Əminliklə deyə bilərik ki, internetə çıxışı olan həmin kompüterlərin hər birinin masaüstündə Skype və ya video görüntünü təmin edən digər bir proqram görəcəyik. Kimi uzaqdakı yaxını ilə əlaqə saxlamaq üçün istifadə edir, kimi dost-tanışı ilə, kimisi də işgüzar məqsədlə. Ancaq hamı üçün ortaq olan bir nöqtə var ki, internet məsafələri saniyələr içində yox etməyi bacaran, uzağı yaxın edən, dünyanı bir pəncərədən baxıb görürmüş kimi, gümüş sinidə önümüzə gətirən yeganə vasitədir.Bir sözlə, internetin faydalarından hamı yararlanır, müxtəlif yollarla və fərqli məqsədlər üçün.                                                        Maraq dairəmiz çərçivəsində və ehtiyac duyduğumuz hər mövzuda informasiyanın əldə  edilməsində, mariflənmə və dünyada baş verən yeniliklərdən xəbər tutmaq, ən qısa zamanda məlumatlanmaq üçün ən əlverişli, ən ucuz və yeganə təminatçımızdır internet.

İnternetin zərərləri, mənfi cəhətləri, insanların həyatına neqativ təsirləri barədə hər zaman müzakirələr gedir. Ancaq bir məqamı unudurlar ki, əldə edilən hansısa zərərli məlumat və ya mənfi təsirlərə görə internet məsuliyyət daşımır.Biz axtarış çubuğunda hansı məlumatı axtarışa versək, məhz həmin açar söz və ona uyğun məlumatlar axtarışın nəticəsi olaraq bizim istifadəmizə təqdim olunur.                                                                Yəni televiziya və radiodan fərqli olaraq burada biz, ancaq istədiyimiz məlumatı əldə edirik. Təbii olaraq, əldə edilən məlumatın nə dərəcədə faydalı və ya faydasız olması bizdən asılıdır. Əgər lazımlı məlumatla maraqlansaq, maariflənmək niyyətinə istifadə etsək və lazımsız saytların, zərərli malumatların oxucusu/izləyicisinə çevrilməkdən özümüzü qoruya bilsək, o zaman internetin əslində o qədər də zərərli olmadığını daha yaxşı başa düşə bilərik.                                                                                                                              

Bu gün internet vasitəsilə, bir çox əhəmiyyətli iş müqavilələri bağlanır.Çox ciddi və əhəmiyyətli biznes əlaqələri qurulur. Müasir dünyanın maliyyə dövriyyəsinin böyük bir hissəsini təşkil edən elektron ticarətin əsas dayaq nöqtəsidir internet. Dünya əhalisinin elektron ticarət/satışla məşğul olan müxtəlif saytların xidmətlərindən yararlanmaq və elektron bir şəbəkənin istifadəçisi olmaq istiqamətində ən əsas və danılmaz bələdçisi olan bir xidmət növüdür internet.                                                                                                                                                Bu gün internet vasitəsilə insanlar dünyanın bir çox reytinqli, yüksək səviyyədə təhsil verən, böyük Universitet və Kolleclərində təhsil alırlar.İnternet vasitəsilə bir sıra beynəlxalq və yerli seminar, təlim və elmi video-konfranslar təşkil edilir.Eyni zamanda,                           internet vasitəsilə online kurslara yazılmaq, zaman və pul itkisi yaşamdan bilik və təcrübə əldə etmək də mümkündür.                                                                                                            Həmçinin internet vasitəsilə SMM-Sosial Media Meneceri, Dizayner, Kopirayter kimi freelance (sərbəst zamanlı iş) işləmək belə mümkündür ki, bütün bu fürsətlərin də zərərli deyil, əksinə faydalı olduğu danılmazdır.                                                                                                  Sadaladığımız və daha adını çəkmədiyimiz yüzlərlə faydaları varkən, internetin həyatımıza hansısa mənfi təsirlərinin müzakirəsini aparmağın yeri yoxdur əslində. Sadəcə, hər hansı bir nümunə ilə mənfi və ya müsbət təsir anlayışlarını müqayisə edə bilərik.                                                                                                                                                 Məsələn: gündəlik məişətdə, kənd təsərrüfatında, sənayedə işlətdiyimiz su. Su əslində həyatımızın var olma səbəblərindən biri, kainatda baş verən geoloji, bioloji və s. fəaliyyəti təmin edən ən başlıca ünsürlərdən biridir. Sudan müxtəlif səbəblər üçün istifadə olunur. Susuzluğu yatırmaq üçün, təmizliyi təmin etmək üçün,əkin-biçini suvarmaq üçün, fabrik-zavodların işini təmin etmək üçün və s. Bütün bunlar da öz növbəsində bizi ərzaq, qida, geyim və s. ilə təmin edir. Bunlar suyun faydalı tərəfləri. Amma, əgər biz su ilə doldurulmuş bir hovuza və ya böyük bir çəlləyə üzə bilməyən bir adamı itələsək, təbii ki, əslində həyat mənbəyi olan su, bir insanın həyatını itirməsinə səbəb olacaq...Bu da suyun verdiyi zərər.                                                                          

Deməli, belə bir qənaətə gəlmək olar ki, əsas olan nədən istifadə etdiyimiz deyil, nə cür istifadə etdiyimizdir.Həyatımızı asanlaşdıran, qlobal informasiya bazası ilə insanlar arasında vasitəçilik edən interneti qınamaqdansa, ondan yersiz və zərərverici məqsədlər üçün istifadə edən biz istifadəçilərin əllərini, gözlərini, qulaqlarını tərbiyələndirmək, doğru yola çəkmək daha məqsədə uyğun olacaq.