Qazobeton nədir və digər materiallardan üstünlükləri

Qazobeton nədir və digər materiallardan üstünlükləri

 

Müasir texnologiyalar təbii olaraq tikinti sahəsinə də müdaxilə edir. Yeni məhsullar bazarlardan köhnə materialları sıxışdırıb çıxarırlar. Üstünlüyə gəldikdə isə, bu hər məhsulda bir cür olur. Bəziləri yüngül olub oda davamlı olur, bəziləri nəmişliyə davamlı olurlar, bəzilərisə vaxt baxımından çox qənaətcil sayılırlar. Bugün danışacağımız tikinti materialı olan qazobeton bloklar da məhz yeni texnlogiyaların məhsuludur və üstünlükləri də çoxdur.

 

Nəinki dünyada, üstəlik ölkəmizdə də qazobeton bloklar məşhurluq əldə etməyə davam edirlər. Üstəlik yerli istehsal da bazarları fəth etməyə başlayıb. Baxmayaraq ki, qazobeton blokları daha çox divar hörgüləri üçün istifadə olunur, onu tam şəkildə evin tikintisində istifadə etmək mümkündür, sadəcə müəyyən standartlara riayət etməklə.  Qazobeton nədir? Qazobeton avtoklav bərkimənin məsaməli blok məhsuludur. Məhsulun xammalı kvars qumu, əhəng, sement, su və alümin tozudur. Bütün bu komponentlər qarışdırılıb avtoklava göndərilir. Orada yüksək təzyiq altında qarışım köpüklənir və məsaməli struktura çevrilir.

 

Qazobeton bloklar demək olar ki, ən möhkəm materialdır, bununla belə həm yüngül, həm də istilik keçirməyəndir. Qazobeton bloklar standart ölçülərdə istehsal olunmasına baxmayaraq, adi mişarla çox asanlıqla istənilən ölçüdə, səliqəli formada kəsilir.

 

Bu bloklar çox yaxşı istilik keçirməyən materialdır. Qışda soyuğu içəriyə, istini isə çölə buraxmır. Yayda da günəş şüalarının təsirindən qızmır, nəticədə evin daxilində sərin hava olur.

 

Səs izolyasiyası cəhətdən də üstünlükləri mövcuddur. Lakin bu göstərici qazobeton blokların markasından, tərkibindəki məhlulun qatılığından, düzülüş növündən və divarın qalınlığından asılıdır.

 

Qazobeton bloklar yanğına qarşı dözümlülüyə görə ən birinci pillədə dururlar. Həm bünövrəsi, həm də divarları qazobeton bloklardan tikilən ev yüksək şəkildə yanğına dözümlüdür.

 

Ekoloji cəhətdən bu materiallar təmizdirlər. Radiasiya xasssəsi normadan qat-qat aşağıdır və heç bir formada özündən zəhərli maddələr buraxmır. Buna görə də ekoloji təmizliyinə görə digər materiallardan geri qalmır.

 

600x100x250 ölçüdəki qazobeton blokun 500 kq/m3 orta sıxlıqda çəkisi 7.5 kqdır. Digər daş tərkibli materiallarla müqayisədə bu, çox yüngül material olduğundan həm aralıq məhlulu az tələb edir, həm də tikinti vaxtında xeyli qənaət etmiş olur.

 

Qazobeton blok kif göbələyinin, bakteriyaların əmələ gəlməsi üçün qeyri-münbit mühitdir. Hətta 30° tempraturda və 98% nəmişlikdə belə adı çəkilən amillərə qarşı qazobeton bloklar davamlıdırlar. Bu isə taxta materialına görə daha böyük üstünlükdür, özü də nəzərə almaq lazımdır ki, bloklar taxtadan fərqli olaraq antiseptiklərlə emala ehtiyac duymurlar.

 

Üstünlüklərindən əlavə qazobetonların əksik tərəfləri də var. Möhkəm olmasına baxmayaraq, düzgün şəkildə hesablanmayan bünövrə üzərində qazobeton iki-üç ilə çatlaya bilər. Buna görə də bünövrəni lent şəkilli monolit seçmək, blokları isə hər iki-üç sıradan bir armatur şəbəkə ilə işləmək lazımdır.

Özünə su hopdurduğu üçün bəzən blokların üzərini üzləmək olmur. Buna görə də üzləməmişdən qabaq onu xüsusi məhlul ilə işləyirlər. Tərkibində yetərincə sərbəst formada əhəng olduğu üçün daxilindəki metal hissələri korroziya etmə bacarığına sahibdir.

Qiyməti ucuz olan qazobeton blokların keyfiyyəti heç də yüksək olmur. Bəli, ümumi götürdükdə digər materiallara nisbətən ucuz başa gəlir, lakin bu, qazobeton blok seçərkən ucuzluğa qaçmanız anlamına gəlmir. Şaxtaya davamlılıq baxımından da yalnız bəzi markalar bu kriteriyaya uyğun gəlirlər.

Bu material günümüzdə yeni olduğu üçün onun uzunömürlü olması da hələ öz təsdiqini tapmayıb. Buna görə də özünü doğrultması üçün hələ çox zamana ehtiyacı var. Qazobeton bloklar eynilə digər materiallar kimidir: taxta ilə də, kərpici ilə də tikəndə material seçimində diqqət etmək, yüz ölçüb bir biçmək lazımdır.