Əgər əlinizin altında boş mənziliniz varsa, nə etməli?
Bəzən elə olur ki, mənzil sahiblərinin bir deyil, iki və bəlkə də daha çox evləri olur. Təbii ki, məntiqli olardı, əgər biz ev sahibinin eyni vaxtda bu mənzillərin hamısında qala bilməyəcəyi fikri irəli sürsəydik. Buna görə də kənarda qalan evlər boş qalırlar. Bu zaman evdə heç kəsin qalmamasına baxmayaraq, kommunal xərcləri ödəmək yenə də lazım gəlir. Suya görə aylıq ödəniş ya sayğacla, ya da mənzildə qeydiyyatda olan şəxslərin adam başına düşən qiymətlə hesablanır. Ev boş olduğu zaman su idarəsindən gələn işçilər qapının açılmadığı təqdirdə hesabı adam başına hesablayırlar. Yəni sayğac mənzilin daxilində yerləşdiyi təqdirdə, mənzildə sudan istifadə olunmasa da sizin üzərinizə borc yazılacaqdır. Yox əgər sayğac çöldədirsə, o zaman narahat olmağa dəyməz. Bir də evi uzun müddətliyə boş qoyacaqsınızsa, o zaman su borularını diqqətlə yoxlayın ki, siz olmadığınız vaxt axıntı olmasın.
İşıqla da eyni qaydadır. Evi tərk edərkən bütün mümkün işıqları söndürün və əminlik üçün bir neçə dəfə yoxlayın. Sudan fərqli olaraq, işığın əlavə pul yazmasından başqa, yanğına da səbəb ola bilmə xüsusiyyəti var. Qaz sayğacları kartla olduqları üçün sizə borc yazılması mümkünsüzdür. Qalır istilik sistemi. O da əgər qış fəslinə düşürsə, narahat olmağa dəyər. Ancaq siz yenə də evin boş olması barədə istilik təchizatı mərkəzinə yazılı formada müraciət edə bilərsiniz.
Ev telefonu, internet, kabel televiziyası xidmətlərini də saxlatmanız vacibdir. Əks halda sizin evdə olub-olmamanız bu borclardan qurtulmanıza yardım etməyəcək. Ezamiyyətə getsəniz və ya hansısa bir xətəlik ucbatından xəstəxanada uzun müddət olsanız bu barədə sənəd əldə edib, yerli orqanlara təqdim etməklə, borclarınızın bir hissəsinin silinməsinə nail ola bilərsiniz.
Boş qalan mənzil üçün ən yaxşı variant onun kirayəyə verilməsidir. Bu sizi həm yuxarıda yazılan əziyyətlərdən qurtaracaq, həm də əlavə gəlir əldə edəcəksiniz. Siz mənzili həm qısa, həm də uzun müddətli kirayəyə verə bilərsiniz. Qısa müddətə verə biləcəyiniz şəxslər şəhərə iş tapmağa gələnlər, tələbələr və ya turistlər ola bilərlər. Lakin mənzilin qısa müddətli kirayəyə verilməsinin öz mənfi cəhəti var. Birincisi, ev sahibi mənzili kirayişinlərə ev əşyaları ilə birlikdə verir, üstəlik ev sahibi həmin evə qayıtdığı zaman evin hansı vəziyyətdə olacağı bilinmir. Buna görə də çoxsu mənzilini qısa müddətliyə adətən tanış adamlara verir. Qısa müddətə verildiyi təqdirdə mənzilin kirayə haqqı nisbətən ucuz olur. Buna görə də oradakı sizə lazım olan əşyaları boşaldıb, evi uzun müddətliyə daha yüksək qiymətə kirayəyə verməyiniz məsləhətdir.
Mənzili uzun müddət sahibsiz qoymaq indiki vaxtda düzgün deyil. Yuxarıda qeyd etdiyimiz kimi, mənzildə yanğın baş verə bilər, hər hansı bir su borusu zədələnib evinizi su basa bilər, üstəlik də həmin su aşağı qonşularınıza axıb onların evinə də ziyan vura bilər. Buna görə də bu cür hallarla qarşılaşmamanız üçün ilk öncə evinizini müntəzəm olaraq nəzarət etməniz vacibdir. Yox əgər, mənzilinizə tez-tez baş çəkə bilməyəcəksinizsə, o zaman onu sığorta etməyiniz də sizi bu cür hadisələrdən sığortalayır.
Bundan başqa, təhlükəsizlik xidməti göstərən şirkətlərin xidmətindən istifadə edə bilərsiniz. Açığı bu cür xidmətlər bir azacıq baha olurlar, ancaq mənzilinizə edilən istənilən müdaxilə zamanı şirkət dərhal sizin mənzilinizə baş çəkib, həyəcan siqnalının səbəblərini araşdıracaqlar. Nəticədə siz öz evinizdə rahat oturub, heç nəyə görə narahat olmaya bilərsiniz. Mənzilinizə daxil olma cəhdləri barədə şirkət sizi məlumatlandıracaqdır.