İnteryer: dərhal düzəlməsi gərəkən 7 səhv
İnteryerimizdə olan xoşagəlməz, dəbsiz və sadəcə ebəcər olan şeylər haqqda.
Təbii ki, evdə olan hər bir əşyanın özünə məxsus funksiyası var, lakin anlamaq da lazımdır ki, hər şeyin bir qədəri var – bu zamanla yoxlanmış köhnə qaydadır, və çox zaman bizim hansısa bir əşyaya olan sevgimiz onun əslində evimizə lazım olduğu deməy deyil. Bəs hansı səhvlər ən çox yayılıb, və onlardan qaçınmaq üçün nə etmək olar?
Yumşaq çoxluq
Bir tərəfdən, çoxsaylı dekorativ yastıqlar qonaq otağına rahat və isti abu-hava bəxş edir, yoğun iş günündən sonra yumşaq yastığlara söykənib çay və yaxud kofe içərək televizora baxmağın öz ləzzəti var, amma qədərinə qədər. Yastıqların çoxluğu otağı vizual baxışdan balacaşdırır. Bəs nə etməli? Əlbəttə, evdəki bütün dekorativ yastıqları çölə tullamağa tələsməyə ehtiyyac yoxdur, sadəcə bir neçə qaydaya riayyət etmək yetər. Məsələn, balaca mənzildən söz gedirsə “nə qədər az olsa yaxşıdır” qaydası tam yerinə düşər. Belə hallarda iki-üç rəngbərəng, fərqli boyda dekorativ yastıq bəsdir.
Mətbəxtdəki xırda-xuruş şeylər
Əsmər xalanın Çindən gətirdiyi balaca və şirin çaydanlar, üç il əvvəl ad günündə hədiyyə olunmuş kokteyl qədəhləri, “Əli və Nino”da endirim varıydı deyə alınmış kulinariya kitabı...Yaxşıca fikirləşin – doğrudan mı bunların hamısı Sizə lazımdır? Bəlkə heç Siz onlarda istifadə etmirsiniz? Narahat olmağa dəyməz, düşünmürəm ki, Əsmər xala Sizdən inciyər, onsuzda Sizin evdə kokteyl içilmir, və yeməklərin resptinə baxmaq üçün Googledan rahatı yoxdur. Yadınızda saxlayın ki, mətbəx, ilk öncə, funksional bir yedir, ona görə onu cazibədar olsa da lazımsız şeylərlə doldurmayın.
Xatirələr,xatirələr...
Rəflərdə duran ailə yadigarları, sözsüz, illərin sevincini, kədərini görmüş, dəyəri heç bir pulnan sayılmaz xatirələr xəzinəsidir. Amma onu da xatırlamaq lazımdır ki, Sizin eviniz muzey deyil. Nə etməli, soruşacaqsınız məndən, narahat olmayın, Sizə nənənizin cehiz gətirdiyi antikvar məcməyini atmanızı tövsiyə etməyəcəyəm. Bax bu keçən əsrdən qalmış qırıq saat isə Sizin evi dərhal tərk etməlidir!
Rəflər
Hal hazırda hər kəsin zövqünə və cibinə uyğun o qədər fərqli və maraqlı dizaynda rəflər var ki. Məsələn, onlar mətbəxdə çox faydalı olur: orada ədviyyat saxlamaq olar. İnteryeri öz dizaynı ilə tamamlayan rəflərdə kitabalar və yaxud dekorativ qab-qacaq və fiqurlar çox sevimli gorünür. Lakin nə qədər çox rəfiniz varsa, o qədər də çox oranı lazımsız şeylərlə doldurmaq istəyi oyanır. Yeganə çıxış yolunuz evdə rəflərin sayını minimuma gətirmək, və orada yalnız lazımlı şeylər saxlamaqdır.
Təhlükəli gözəllik
Xırda şeylər - açarlar, balaca aksessuarlar, televizor və kondisioner pultu – üçün bir çox rəngdə və formada olan dekorativ qablar və konteynerlər masanın üzərində çox effektiv görünür. Amma bu gözəl əşyalar həm də çox təhlükəlidir: evdə onlardan çoxdursa, onlar o an diqqəti öz əlvan və parlaq tərəflərinə cəlb edib, şirin bir dekoratıv elementdən tam bir problemə çevrilirlər. Nə etməli? Onların sayını azaldın, ən çox ən maraqlı və effektiv görünənlərinə üstünlük verin.
Bilik qüllələri
Dünyada, yəqin, kitab oxumaqdan maraqlı şey yodur – bir-birindən maraqlı səyahətlər və sərgüzəştlər kağız və mürəkkəb cildini almış, Sizi gözləyir! Eh, kim bilərdiki belə bir şeylərə də özünə məxsus “dəb” olacaq... Bir çox insan fikirləşir ki yerdə, masanın üzərində və yaxud rəflərdə xaotik şəkildə bir-birinin üzərinə kitab qoymaq çox estetik görünür. Təbii ki, hərənin öz zövqü var, amma mənimlə razılaşın, bu çox da səliqəli görünmür. Tövsiyyəm dədə-baba qaydası ilə hərəkət etməkdir – kitab rəfi alın.
Hər şeyi xatırlamalı
Yəqin, bunda serialların və oradakı cazibədar iş adamlarının və onların zərif xanımlarının günahı az deyil – artıq bir neçə belə “sənət əsərində” bu şeyi görmüşəm. Nəyəsə görə belə bir fikir var ki soyuducunun üzərində xatırladıcı stikerlər yapışdırmaq ev sahibini səliqəli və mütəşəkkill insan kimi göstərir. Tam tərsinə: bu çox səliqəsiz görünür, bu vərdişi tərgidsəniz yaxşı olar. Belə şeylər üçün maqnitdən və ya taxtadan lövhə asa bilərsiniz, və fikir verin ki, ora yalnız aktual informasiya ilə dolu olsun.
Gözəl bir inglis məsəli var: “Mənim evim – mənim qalam”. Evinizin sahəsinin fərqi yoxdur, bu divarlar sadəcə Sizin yatdığınız yer deyil, bu divarlar Sizin həyatınızın, hekayənizin bir hissəsini qucaqlayan və qoruyan bir tikilidir.