Mənzillərdə səs-küyün aradan qaldırılması
Bəzən olur ki, bina evində mənzil satmaq istəyirsiniz, lakin alıcılar bina evlərində çoxlu səs-küyün olduğu səbəbini gətirərək, həyət evlərinə üz tuturlar. Panel və beton evlərdə səs-küy məsələsi həqiqətən olur və çoxları ümumiyyətlə bu problemi aradan qaldırmaq üçün heç nə etmirlər. Heç kim istəməz ki, onun evində olan ailə daxili münaqişə başqalarının qulağına gedib çatsın və təbii ki, özləri də başqalarının münaqişəsinə şahid olmaq istəməzlər. Bunun üçün satacağınız mənzili yaxşıca izolə edib, bunu gələcək müştərilərinizə əlavə bir üstünülk kimi göstərə bilərsiniz və rəqabət bazarında irəli çıxa bilərsiniz. Bəs bu izoləni necə etməli sualını verirsinizsə, keçək mətləbə.
Otaqda düzgün qoyulmuş mebel səs-küyü nisbətən aradan qaldırır. Misal üçün, divar boyunca quraşdırılmış taxta dolab, çox yaxşı səs boğucu effektə malikdir. Bundan başqa, qonşu ilə ortaq divar tərəfdən yatağınızı nə qədər uzaq tutsanız, bir o qədər səsdən aralı qalmış olarsınız.
Səs-küy qonşulardan əlavə çöldən də gəlir. Əgər siz magistral yol tərəfdə qalsanız, bu ümumiyyətlə yuxusuz gecələr deməkdir. Bura gecələri itlərin hürməyini də əlavə etsək, mənzili heç kimin almayacağı zəmanəti artır. Çöldən gələn səsi boğmağın ən yaxşı yolu keyfiyyətli plastik pəncərələrdir. Çalışın bazarda tanınmış plastik pəncərə hazırlayan və satan şirkətlərə müraciət edəsiniz. Üstəlik pəncərə seçərkən, səskeçirmə xüsusiyyətləri (Db) aşağı olanlara üstünlük verin. Şüşələri müxtəlif qalınlıqda götürməklə və aralarındakı məsafələri artırıb-azaltmaqla da səsin qarşısını ala bilərsiniz.
Pəncərələrə əlavə səs boğucu effekt vermək üçün pərdələrdən istifadə edə bilərsiniz. Bu, ya sıx, ya da ki, ikiqat pərdələr ola bilər. Pərdələr sizi həm səs-küydən, həm də günəş şüalarından, istidən, yelçəkəndən qoruyar. Üstəlik pərdə dekorativ funksiyanı da yerinə yetirir.
Qalın taxtadan işlənilən döşəmə nazik materialdan işlənmiş döşəmədən daha az səs keçirir. Səs izolyasını artırmaq üçün döşəməyə qalın lifli xalça sərmək olar. Bu əsasən, evində körpə uşaq olan ailələrə daha çox sərf edər. Uşaqlar oynadıqları zaman aşağıdakı qonşular şikayətə gəlməsinlər dəyə bu əlverişli üsuldur. Yox əgər xalçanız nazikdirsə, o zaman onu bir neçə qat sərə bilərsiniz.
Bəzən səsi yayan hissələrdən biri elektrik yuvaları olur. Elə olur ki, onlar yel çəkirlər və sizin evdə danışılan istənilən söhbət qonşuda çox aydın şəkildə eşidilir. Bunun qarşısını almaq üçün, yuvalar sökülür və ətrafı xüsusi mineral pambıq və ya asbest kağızı ilə izolə edilir. Boş qalan yerləri isə ya sementlə, ya da silikon germetik ilə doldurmaq qalır. Qəti şəkildə köpükdən istifadə etməyin. O, alovun təsirindən alışıb yanır. Ümumiyyətlə, əgər ehtiyat edirsinizsə, işi eletkrik mütəxəssislərinə tapşırın.
Tikinti zamanı aralıqların və dəliklərin qarşısını almaq üçün bəzən vibro izolə gilizdən istifadə olunur. O olmadıqda isə səs keçirir. Bu əsasən boruların daxi ətrafı olur. Mövcud problemi aradan qaldırmaq üçün boruların ətrafını sementdən təmizləməli (tam şəkildə deyil), boruları azbest kağızı və ya mineral pambıqla örtüb yenidən həmin yeri sementləmək lazımdır.
Divarlara bəzəkli tıxac lövhəsi asmaqla və ya rəsmlər, plakatlar ilə bəzəməklə səs-küyü aradan qaldıra bilərsiniz.
Yəqin ki, meşələrdəki səssizlikdən agahsınız. Bu səssizlik bitkilərin sayəsində olur. Bəli, bitkilər səsi özlərinə hopdurma xüsusiyyətinə malikdirlər. Buna görə də pəncərə qabğına düzülmüş bitkilər sizə həm oksigen verir, həm də səsdən qoruyur. Bitkilərin yaşıl tacı nə qədər geniş olarsa, səsi də bir o qədər çox hopdurarlar.
Həyət qapıları da evin səs buraxan əsas hissələrindəndir. Səs əsasən qapı ilə onun qutusu və ya qutu ilə divar arasındakı boşluqlardan keçir. Boşluğu köpük ilə doldurmaq onu səs keçiriciliyini azaltmır. Əksinə köpük yaxşı səs keçirən materialdır. Ən yaxşısı həmin boşluqları sement məhlulu ilə doldurmaqdır.